_1704867435.jpeg)
विराटनगर: प्रदेश १ का सामाजिक विकास मन्त्री जयराम यादवले सामाजिक सुरक्षा भत्ताका कारण जेष्ठ नागरिकलाई हेरिने दृष्टिकोणमा परिवर्तन आएको बताएका छन् ।
सामाजिक सुरक्षा भत्ताकै कारण परिवारबाट जेष्ठ नागरिकले माया पाएको उनले बताए । मन्त्री यादवले भने,‘छोरा–छोरीले सम्मान गर्ने गरेको पाईएको छ ।’ राष्ट्रिय परिचयपत्र तथा पञ्जीकरण विभागले आज विराटनगरमा आयोजना गरेको सामाजिक सुरक्षा कार्यक्रमको प्रभावकारीतामा सरकार र नागरिकको भूमिका विषयक सार्वजनिक सुनुवाई कार्यक्रममा मन्त्री यादवले सो कुरा बताएका हुन् ।
उनले सामाजिक सुरक्षा भत्ता वितरणमा हुने गरेको असहजतालाई सहज बनाउनुपर्नेमा पनि जोड दिए । मन्त्री यादवले अन्यको तुलनामा पूर्ण अपाङ्गता भएका व्यक्तिहरुले पाईरहेको सामाजिक सुरक्षा भत्ता बृद्धि गर्न आवश्यक रहेको बताए ।
सार्वजनिक सुनुवाई कार्यक्रममा सामाजिक विकास मन्त्री यादवले नेपाली नागरिकको पहिचानका नाममा धेरै प्रमाण–पत्रले झन्झटिलो बनाएको पनि बताए । उनले भने,‘हामी कति प्रमाण दिने ?’ नागरिकताको सवालमा धेरै समस्या देखिएको उनले बताए । मन्त्री यादवले भने,‘भूमीपुत्रहरुलाई खोजेर नागरिकता दिनुपर्छ ।’ भूमीपुत्रहरु नागरिकता नपाएर पलायन हुनुपर्ने अवस्था आउन दिनु नहुनेमा उनको जोडछ ।
