_1704867435.jpeg)
धरान: एक जनाको ज्यान जाने गरि धरान १७ आदर्श चोकमा भएको ग्याँस लिकेज घटनामा ग्याँस सिलिण्डर मर्मत गर्न पुगेका २ जना व्यक्तिहरु कुनै पनि डिलर वा आधिकारिक बिक्रेताको नभएको खुलेको छ ।
धरान उपमहानगरपालिकाका उपप्रमुख अइन्द्रबिक्रम बेघाको संयोजकत्वमा ग्याँस डिलर तथा बिक्रेताहरुसँगको छलफलमा घटना भएको घरमा ग्याँस सिलिण्डर मर्मत गर्न जाने २ व्यक्ति गाडीमा ग्याँस सिलिण्डर बिक्री गर्ने भएपनि कुनै पनि डिलरको नभएको व्यवसायीहरुले खुलाएका हुन् । उक्त घटनामा ग्याँस मर्मत गर्न पुगेका अनिष कार्की र वासुदेव खड्का पनि घाइते छन् ।
कार्की र खड्काले कोशी ग्याँसको डिलर अरुण डालमियाको कोशी इन्टरप्राइजेजबाट सिलिण्डरहरु खरिद गरेर आफै गाडीमा बिक्री गर्दै लंैजाने गरेको पनि खुलेको छ । सोही कारण उनीहरुमा ग्याँस सिलिण्डर लिकेज हुँदा सामान्य प्राविधिक ज्ञानसमेत नहुँदा उक्त घटना भएको कोशी ग्याँस कम्पनीका प्रतिनिधि प्रविण सिगौरी बिककले बताए । उनले डिलरहरुले सिधै उपभोक्तालाई ग्याँस बिक्री गर्नुपर्नेमा अनधिकृत व्यक्तिलाई त्यसरी ग्याँस बिक्री गर्नु डिलरको कमजोरी भएको पनि स्वीकारे ।
डिलरले अनधिकृत व्यक्तिलाई ग्याँस बिक्री गर्न दिदा उपभोक्तासँग डिलरको सम्पर्क टुट्ने र केही समस्या हुँदा प्राविधिकरुपमा दक्ष व्यक्ति मर्मत गर्न नपुग्ने जोखिम हुन्छ । धरान १७ को घटना हुनुको मुख्य कारण यही भएको पनि उनले बताए । उक्त घरमा डिलरबाटै सिलिण्डर मर्मत गर्न कर्मचारी पुगेको भए त्यसदिन घटना नहुने पनि उनले बताए । उपभोक्ताहरुले डिलरबाट नै ग्याँस खरिद गर्न र डिलरहरुले पनि सिधै उपभोक्तालाई मात्र ग्याँस बिक्री गर्नुपर्ने पनि उनले आग्रह गरे ।
कम्पनीका प्रतिनिधि बिकले घाइतेहरुको उपचारको खर्च सबै उपलब्ध गराइरहेको पनि जानकारी दिए । घाइतेहरुको किर्तिपुर बर्न हस्पिटलमा उपचार भइरहेको छ । उनका अनुसार घटना भएकै दिन स्थलगत अनुगमन गर्दा ग्याँस सिलिण्डर बिस्फोट नभएको तर सिलिण्डर लिकेज भएर उक्त घटना भएको हो । घरको सबै झ्याल, ढोका थुनिएको कारण लिकेज भएको ग्याँस बाहिर निस्कन नपाएको र मर्मत गर्न पुगेका २ जनालाई पनि सामान्या ज्ञान नहुदा लाइटर बालेपछि दुःखद घटना हुनपुगेको उनले बताए । उक्त घटनामा घाइते सोनिका राईको उपचारको क्रममा मृत्यु भएको छ भने उनकी दिदी सविता राई, घर भाडामा बस्ने अञ्जना राई, उनकी सासु राजकुमारी राई, ग्याँस मर्मत गर्ने अनिष र वासुदेवको उपचार भइरहेको छ ।
ग्याँस डिलर तथा बिक्रेताहरुलाई कडाई गर्ने
एक जनाको ज्यान जाने गरि धरान १७ आदर्श चोकमा भएको ग्याँस सिलिण्डर लिकेज घटना पछि धरान उपमहानगरपालिकाले एलपी ग्याँस डिलर तथा बिक्रेताहरुलाई कडाई गर्ने भएको छ । उपप्रमुख अइन्द्रबिक्रम बेघाको संयोजकत्वमा सोमबार धरानका ग्याँस व्यवसायीहरुसँगको छलफलले जथाभावीरुपमा ग्याँस बिक्रीवितरण गर्न नदिने निर्णय गरेको हो ।
छलफलले इजजात प्राप्त डिलर र व्यवसायीले मात्र ग्याँस बिक्री वितरण गर्नुपर्ने र त्यसो नभएको पाइए सम्बन्धित डिलर तथा बिक्रेतालाई कानुन वमोजिम कारबाही गर्ने पनि निर्णय भएको छ । छलफलले अनिवार्यरुपमा उपभोक्ता तथा प्रयोगकर्तालाई प्रयोग गर्ने विधि सिकाउनुपर्ने पनि निर्णय गरेको छ । यसैगरि, प्रत्येक ग्याँस डिलरले प्राविधिक परिक्षण गरिएका ग्याँस मात्र बिक्रीवितरण गर्नुपर्ने र अनिवार्यरुपमा प्राविधिक राख्नुपर्ने पनि निर्णय गरेको छ । साथै, घटनामा घाइते तथा ज्यान गएको व्यक्तिको सम्बन्धमा कोशी ग्याँस कम्पनी तर्फबाट आवश्यक स्वास्थ्य उपचार तथा क्षतिपूर्ति व्यहार्ने निर्णय पनि भएको छ भने धरानका ग्याँस पसलहरुमा संयुक्त अनुगमन गर्ने निर्णय पनि गरेको छ ।
भिडियो:
