_1704867435.jpeg)
धरान: नेपाल कम्युनिष्ट पार्टी(नेकपा) ओली समुहको जिल्ला कमिटी विस्तार गरेर सपथ ग्रहण गरेको छ ।
नेकपा ओली समुहले रेवतीरमण भण्डारीको अध्यक्षतामा साविकको जिल्ला कमिटीलाई विस्तार गरि ४ सय ६७ सदस्यीय बनाएको हो । नेकपामा साविक १६७ सदस्यीय जिल्ला कमिटी थियो । सोही कमिटीलाई विस्तार गरिएको ओली समुहले जनाएको छ । कमिटीको उपाध्यक्षमा निलम खनाल, सचिवमा पर्शुराम यादव र सह-सचिवमा लिलम बस्नेत छन् । यस्तै, संगठन विभाग प्रमुखमा योग्यराज खड्का र कार्यालय सचिवमा राम कोइराला छन् । कमिटीको आज शनिबार इनरुवामा सपथ ग्रहणसमेत भएको छ ।
यसैगरि, पदाधिकारीसहित ११ जनाको कार्यालय गठन गरिएको छ । पदाधिकारीहरुबाहेक कार्यालय टिममा मञ्जु भण्डारी, याम सुब्बा, चन्द्र न्यौपाने, नवराज राई, दिवस राय र इनरुवाबाट एक जना छन् । अध्यक्ष भण्डारीले सचिवालय भने पछि गठन हुने उनले बताए । ‘पुरानो १६७ कमिटीलाई विस्तार गरेर नै ४६७ सदस्यीय कमिटी बनाइएको हो,’अध्यक्ष भण्डारीले भने,‘कार्यालय गठन भएको छ । सचिवालय पछि नै बनाउछौं ।’
चारै निर्वाचन क्षेत्र जित्ने घोषणा
सपथ ग्रहण गरेलगत्तै बसेको जिल्ला कमिटीको दोस्रो बैठकले प्रधानमन्त्री केपी ओली शर्माले संसद विघटन गरेर ताजा जनादेशमा जाने निर्णलाई समर्थन गर्ने निर्णय पनि गरेको छ । साथै, आागमी बैशाखमा हुने निर्वाचनमा सुनसरीको ४ वटै निर्वाचन क्षेत्र जित्ने घोषणा पनि बैठकबाट गरिएको अध्यक्ष भण्डारीले बताए । उनले भने,‘प्रधानमन्त्रीले ताजा जनादेशमा जाने गरेको निर्णयलाई समर्थन गर्ने र आगामी मध्यावधी निर्वाचनमा सुनसरीको चार वटै निर्वाचन क्षेत्र जित्ने घोषणा गरेका छौं ।’
यस्तै, यही फागुन ८ गते विराटनगरमा हुने जनसभामा सुनसरी जिल्लाबाट ३० हजार जनाको सहभागिता गराउने पनि बैठकले निर्णय गरेको छ । साथै, विस्तार भएको जिल्ला कमिटीलाई जिल्ला अधिवेशन आयोजक कमिटीकोरुपमा घोषणा गरिएको पनि अध्यक्ष भण्डारीले जानकारी दिए ।
