_1704867435.jpeg)
धरान: खानेपानी व्यवस्थापन बोर्डले महशुल अत्यधिक वृद्धि गरेको विरोधमा धरानका १० राजनीतिक दलहरु सडकमा आन्दोलित भएका छन् ।
संयुक्त संघर्ष समिति गठन गरेका १० राजनीतिक दलहरुले आइतबार विरोध र्याली निकालेको थियो । धरान १ स्थित सिंहदेवी चोकबाट शुरु भएको विरोध र्याली खानेपानी बोर्डको कार्यालयमा पुगेको थियो । र्याली पुग्नुअघि नै बोर्डको गेटभित्र सशस्त्र र नेपाल प्रहरी तैनाथ थिए । त्यहाँ केहीबेर चर्का नाराबाजी भएको थियो । गेट हल्लाउने प्रयास भएपनि राजनीतिक दलका नेताहरुले भिडलाई नियन्त्रणबाहिर जान भने दिएनन् ।
विरोध प्रर्दशनमा राजनीतिक दलका नेता, कार्यकर्ताहरुसँगै निवर्तमान सांसद जयकुमार राईदेखि उपमेयर अइन्द्रबिक्रम बेघा, वडाअध्यक्षहरु पनि सहभागी भएका थिए । दलहरुले धर्ना कार्यक्रम भनेपनि आइतबार खानेपानी बोर्ड अध्यक्षको कार्यकक्ष, निर्देशकको कार्यकक्ष र प्रशासनमा पनि तालाबन्दी गरेका थिए । उनीहरुले सोमबार १० बजेसम्म बोर्ड अध्यक्ष तथा मेयर हर्कराज राई (साम्पाङ)बाट ठोस निकास नआए विल काउन्टरहरुमा पनि तालाबन्दी गर्ने घोषणा गरेका छन् ।
खानेपानी निःशुल्क खुवाउछु भनेर आन्दोलन गरेपनि मेयरमा निवार्चित भएपछि अत्यधिक महशुल वृद्धि गरेर जनतालाई महंगीको मारमा परेको भन्दै राजनीतिक दलहरु आन्दोलनमा उत्रिएका हुन् । यसअघि ७२ घण्टाको अल्टिमेटम दिएपनि बोर्डका अध्यक्ष मेयर साम्पाङले वार्तामा नबोलाएपछि राजनीतिक दलहरुले धर्ना र तालाबन्दीमा उत्रिएका हुन् ।
दलहरुले लगाएको ताला माग पुरा नगरि नखोल्न कांग्रेस सभापति श्याम पोखरेलले चेतावनी दिएका छन् । उनले भने,‘असार मसान्तभित्र जति शुल्क थियो, त्यति नबाउञ्जेल यो ताला खोल्ने चेष्टा भयो भने त्यसपछि हुने घटनाको जिम्मा बोर्ड अध्यक्ष र कार्यकारी प्रमुखले लिनुपर्ने हुन्छ । जर्बजस्ती ताला फुटाउने प्रयास भयो भने परिणाम स्वयमले भोग्नुपर्ने चेतावनी दिन चाहन्छौं ।’ उनले अल्टिमेटम दिएको १० दिनसम्म पनि वेवस्ता गरेकोले अब सहेर नबस्ने पनि बताए ।
तालाबन्दी पछि वृहत सभालाई निवर्तमान सांसद जयकुमार राई, पत्रकार एवं नेवार एकता समाजका अध्यक्ष महेश श्रेष्ठ, नागरिक उन्मुक्ति पार्टीका नेता अमर इजम, माओवादी केन्द्रका नेता फोक्वाहाङ चोत्लुङले सम्बोधन गरेका थिए । उनीहरुले आफुहरुको आन्दोलन मेयर साम्पाङको विरुद्धमा नभै खानेपानी बोर्डले एकलौटीढंगले सयौं गुणा बढी महशुल वृद्धिको विरुद्धमा भएको प्रष्ट पारे ।
साथै उनीहरुले राजनीतिक दलहरुले कहिल्यै पनि काम गर्न अवरोध नगरेको स्पष्ट पार्दै नाच्न नजान्ने आगन टेडो भन्ने उखान जस्तै मेयर साम्पाङले दोष अरुलाई दिइरहेको पनि बताए । राजनीतिक दल र जनताले तानाशाहहरुलाई ढालेको इतिहास स्मरण गराउदै उनले मेयर साम्पाङ अहिले पनि सच्चिएर अघि बढुन् भन्ने आफुहरुको चाहना गरेको पनि उनीहरुले बताए । एडिबिको ऋण तिर्नुपर्ने बहानामा जनतालाई महंगीको मारमा पार्न नहुने भन्दै उनीहरुले सोमबार १० बजेभित्र वार्तामा नबोलाए थप सशक्त आन्दोलन हुने पनि नेताहरुले बताए ।
भिडियो:
भिडियो:
