_1704867435.jpeg)
विराटनगर: नेकपा एमाले माधव समूहले समानान्तररुपमा गठन गरेको विराटनगर महानगर कमिटी नेकपा (एकीकृत समाजवादी)मा समाहित भएको छ ।
एमालेभित्र चरम विवाद हुँदा माधव नेपाल पक्षले पारुल क्षेत्रीको अध्यक्षतामा विराटनगर महानगर कमिटी गठन गरेको थियो । सोही कमिटीको बुधबार बसेको बैठकले १७५ सदस्यीय सिंगो कमिटीलाई एकीकृत समाजवादीमा रुपान्तरित हुने सर्वसम्मत निर्णय गरेको क्षेत्रीले बताए । उक्त कमिटीको बैठकमा केन्द्रीय सदस्य घनेन्द्र बस्नेतले नेपाली कम्युनिष्ट आन्दोलनलाई दक्षिणपन्थी अवसरवादको भासमा डुब्नबाट बचाएर क्रान्तिकारी धार निर्माण गर्दै नेपाली कम्युनिष्ट आन्दोलनको रक्षा र विकास गर्ने उद्देश्यले गरिएको एकीकृत समाजवादीको निर्माण गरिएको बताए ।
कम्युनिष्ट आन्दोलन एवं पञ्चायती व्यवस्थाको विरोधमा आफू १५ वर्ष जेल परेको र क्रान्तिको लागि जेल ब्रेक गर्ने कार्य गरेको तर आफूहरू सँगै जेल परेको केपी ओली दरवारियासँग साँठगाँठ गरेको समेत उनले आरोप बताए । ‘पार्टी र बाम आन्दोलनलाई दक्षिणपन्थी अवसरवादीहरूबाट मात्रै होइन मध्यपन्थी अवसरवादीबाट समेत गरिएका जालझेल, षडयन्त्र, हमला र अपहरणका प्रयाससमेत सबैलाई परास्त गर्दै विद्रोह सफल भएको छ,’ उनले भने ।
कार्यक्रममा पार्टीका अर्का केन्द्रीय सदस्य महेश रेग्मीले जनताले दिएको अभूतपूर्व दुइ तिहाई मतको सम्मान गर्न नसकेको र कम्युनिष्ट आन्दोलन नै समाप्त पार्ने प्रयास भएपछि बाध्य भएर विद्रोह गरेको बताए । उनले नेकपा एमालेको पुनर्गठन गरी नयाँ पार्टी नेकपा (एकीकृत समाजवादी) गठन गरेको दाबी गरे । बैठकमा एकीकृत समाजवादीका प्रदेश कमिटीका सदस्यहरु वीरेन्द्र यादव, मणि दाहाल, जिल्ला कमिटीका अध्यक्ष्य चन्द्रवीर राई, उपाध्यक्ष डा. उद्धव पोखरेललगायतले आफ्नो धारणा राखेका थिए ।
