_1704867435.jpeg)
धरान: धरानस्थित दुई छुट्टाछुट्टै स्थानहरुबाट २ थान पेस्तोलसहित ३ जनालाई प्रहरीले पक्राउ गरेको छ ।
पक्राउ पर्नेमा धरान उपमहानगरपालिका १७ डाँडा घोपाका २९ बर्षीय हुकमेन जिमी, उनका भाई पर्ने २४ बर्षीय दिपक जिमी र धरान १५ का २४ बर्षीय रोहित राई रहेका छन । बिशेष सुचनाको आधारमा बैशाख ३१ गते राती ईलाका प्रहरी कार्यालय धरानका प्रहरी निरीक्षक देउप्रसाद लिम्बुको कमाण्डमा प्रहरीले संयुक्त टोलीले छापा मारेको थियो । कोशी प्रदेश प्रहरी कार्यालय विराटनगरको आरआइटि समुह र इलाका प्रहरी कार्यालय धरानबाट खटिएको प्रहरी टोलीले हुकमेन र जिमीलाई उनको घरबाट नियन्त्रणमा लिएको थियो । दुवैलाई सोधपुछ गर्ने क्रममा हुकमेनले २ थान पेस्तोल खरिद गरी ल्याएर १ थान दिपकलाई राख्न दिएको अर्काे १ थान रोहितलाई दिएको वयान दिएका थिए ।
उनीहरुको वयान अनुसार घरदेखि पश्चिम रहेको सर्दुखोला नजिकको झाडीमा झोलामा लुकाएर राखेको नचल्ने अवस्थामा रहेको १ थान पेस्तोल प्रहरीले बरामद गरेको थियो । सोही राती रोहितको घरकोठा खानतलासी गर्दा पलङको डस्ना मुनी लुकाई राखेको अवस्थामा म्याग्जिन सहितको मेड इन इटाली लेखेको १ थान पेस्तोल वरामद भएपनि उनी पक्राउ परेका थिए । दुई वोटा पेस्तोल सहित पक्राउ परेका तीनै जनालाई ५ दिनको म्याद थप भएको र थप अनुसान्धान भईरहेको ईलाका प्रहरी कार्यालय धरानका डिएसपी नवराज मल्लले जानकारी दिए।
