_1704867435.jpeg)
धरान: नेपाली कांग्रेसको महाधिवेशन अन्तर्गत प्रदेशसभा निर्वाचन क्षेत्र र प्रतिनिधि सभा निर्वाचन क्षेत्रको निर्वाचन नजिकिदै गर्दा धमाधम उम्मेदवार घोषणाको लहर चलिरहेको छ । यही लहरको बीचमा धरानका कांग्रेस नेता, कार्यकर्ताहरुलाई तरंगित हुने गरि एउटा खबर फैलियो ।
कांग्रेस नेता रामचन्द्र पौडेल-शेखर कोइराला समुहका प्रमुख व्यक्ति धरानका मेयर तिलक राई देउवा समुहतिर ढल्केको र उनलाई सभापतिमा देउवा समुहले समर्थन गरेको भन्ने हल्लाले बजार पिट्यो । यो हल्ला मात्र हो वा वास्ताविकता नै हो, प्रष्ट भइसकेको छैन । तर, यो हल्लाको पराकम्पन धरानका कांग्रेसजनमा मात्र सिमित छैन, जिल्ला हुँदै केन्द्रसम्म नै तरंगित भएको छ ।
आगामी मंसिर ६ गते कांग्रेसको प्रतिनिधिसभा निर्वाचन क्षेत्रीय समितिको निर्वाचन हुदैछ । पार्टीको नगर अधिवेशनमा धरान उपमहानगर सभापति नबनेका मेयर राईले सुनसरी १ नम्बर क्षेत्रीय सभापति उठ्न चाहेका छन् । तर, पौडेल-कोइराला समुहभित्र क्षेत्रीय सभापतिको उम्मेदवार सर्वसम्मत नहुने स्थिति भएपछि राई देउवा समुहतिर ढल्किएको चर्चा छ । यो समुहबाट क्षेत्रीय सभापतिमा सुजेन्द्र तामाङले पनि उम्मेदवार दाबी गरेका छन् । नेता कोइराला निकट तामाङ यो समुहका वलिया उम्मेदवार हुन् ।
कांग्रेसको १३ औं महाधिवेशनमा पौडेल-कोइराला समुहको नेतृत्व गर्दै धरान उपमहानगरको सभापतिमा प्यानलै जितेका युवा नेता हुन् राई । २०७४ को स्थानीय तह निर्वाचनमा मेयरमा पराजित भएपनि अर्को बर्ष मेयर पदको उपनिर्वाचनमा फेरि उम्मेदवार बनेर कम्युनिष्ट गढ भनिदै आएको धरान उपमहानगरमा कांग्रेसलाई ऐतिहासिक जित दिलाए । यो सफलताले उनको चर्चा राष्ट्रिय मात्र होइन, विदेशमा रहेका नेपालीहरुमाझ पनि चुलियो । गएको असोज ९ गते सम्पन्न नगर अधिवेशनमा पनि राई पौडेल-कोइराला प्यानलमा नै रहेर सभापति श्याम पोख्रेलसहित उनको प्यानललाई जिताउन भुमिका खेलेका थिए । तर, पछिल्लो पटक राई पार्टी सभापति देउवासँग नजिकिएको कांग्रेस नेताहरु बताउँछन् ।
के भन्छन् मेयर राई ?
देउवा समुह प्रवेश गरेको हल्लाबारे मेयर राई भने प्रष्टसँगले खुल्न चाहेनन् । यद्यपी उनले आफ्नो टिम (समुह) भित्र २ जना उम्मेदवार भएको र आफुलाई देउवा पक्षका उम्मेदवार भनिएका पुर्ण सुवेदीले समर्थन गर्दा हल्ला चलेको प्रतिक्रिया दिए । ‘म नगरसभापति छोडेर श्याम पोख्रेललाई बनायौ । स्वभाविकरुपमा क्षेत्रीय सभापतिको दाबेदार हुँ । सुजेन्द्र तामाङ जिल्ला सचिव भएकोले किन तलको पदमा झर्ने भन्ने हो,’राईले भने,‘हामी २ जना उम्मेदवार हुँदा मलाई अर्को समुहबाट समर्थन गर्दा गयो भन्ने भएको होला ।’
क्षेत्रीय सभापतिमा आफ्नो आवश्यकता देखेर नै देउवा समुहका उम्मेदवार पुर्ण सुवेदीले समर्थन जनाएको पनि मेयर राईले बताए । उनले भने,‘धरानको पार्टी सभापति थिएँ, मेयरकोरुपमा कार्यरत छुँ । उहाँले म क्षेत्रीय सभापतिमा आउदा राम्रो हुने देखेर नै सर्मथन गर्नु भयो होला ।’
समझदारी विपरीत हिड्नु भयो: तामाङ
पौडेल-कोइराला समुहबाट कांग्रेसको सुनसरी १ नम्बर क्षेत्रीय सभापतिमा सुजेन्द्र गोले तामाङ अघि बढेका छन् । यो समुहबाट उनीसँगै मेयर राई पनि सभापतिको उम्मेदवार बन्ने होडबाजी छ । तामाङ भने मेयर राईले विगतको समझदारी विपरीत क्षेत्रीय सभापतिमा उम्मेदवार बन्न चाहेको बताउँछन् ।
उनले भने,‘१३ औं महाधिवेशनको बेला नै यसपाली मलाई क्षेत्रीय सभापतिमा सहयोग गर्ने समझदारी भएको थियो । उहाँलाई पार्टी सभापति बनायौ, मेयर पनि बनायौं, तर अहिले त्यो समझदारी विपरीत जानु भयो ।’ यो पटक क्षेत्रीय सभापतिमा आफुलाई उठाउनेबारे १३ औं महाधिवेशनको बेला नै समझदारी भएको तामाङको भनाई छ ।
किसोर राई भन्छन्, 'मेरो टिमलाई हराउनेलाई के आधारमा समर्थन गर्ने ?'
कांग्रेस धरानका प्रभावशाली तथा देउवा समुहका नेता किसोर राई झापालीले भने आफुहरुको टिमको मान्छे नभएकोले मेयर राईलाई समर्थन नहुने प्रष्ट पारे । गएको नगर अधिवेशनमा आफ्नो टिमलाई हराउन भुमिका खेल्नेलाई समर्थन गर्ने आधार नै नभएको उनले बताए ।
गएको नगर अधिवेशनमा धरान उपमहानगर सभापतिमा देउवा समुहबाट उम्मेदवार बनेका राईको प्यानलै पौडेल-कोइराला समुहबाट पराजित भएको थियो । ‘हाम्रो टिमको मान्छे होइन, हिजो मेरो टिमलाई हराएको मान्छे, के आधारमा सपोर्ट गर्ने ?’उनी भन्छन्,‘कसैले स्वार्थ बोकेर देउवा समुहको उम्मेदवार बनाउछ भने ऊ नै जानोस् ।’
देउवा समुहबाट क्षेत्रीय सभापतिका उम्मेदवार पुर्ण सुवेदी पछि हटेको भने राईले स्वीकार गरे । आफ्नो समुहबाट अर्को उम्मेदवार तयार गर्न र प्रचारप्रसार समिति बनाउन छलफल जारी रहेको उनले बताए । ‘उहाँ (पुर्ण सुवेदी) किन पछि सर्नु भयो, भन्नु भएको पनि छैन । हामी अर्को उम्मेदवार र समिति बनाउदैछौं,’उनले भने ।
