_1704867435.jpeg)
एजेन्सीः विश्वभर कोरोना भाइरसको संक्रमणबाट मृत्यु हुनेको संख्या २७ सय पुगेको छ । चीनको वुहानबाट सुरु भएको कोरोनाबाट विश्वभर संक्रमित हुनेको संख्या ८० हजार नाघेको छ ।
अन्र्तराष्ट्रिय समाचार एजेन्सीहरुका अनुसार विश्वभर कोरोनाबाट मृत्यु हुनेको संख्या २६९९ पुगिसकेको छ । मृत्यु हुनेमा अधिकांश चीनका छन् । चीनमा २६६३ जनाको मृत्यु भएको छ भने अन्य मुलुकमा ३६ जनाको मृत्यु भएको छ । विश्वभर ८० हजार १ सय ४८ जनामा कोरोना भाइरस संक्रमण भएको पुष्टि भइसकेको छ ।
चीनपछि सबैभन्दा बढी प्रभावित मुलुक दक्षिण कोरिया हो । कोरियामा ८९३ जनामा कोरोनाको संक्रमण देखिएको छ भने मृत्यु हुनेको संख्या ७ पुगिसकेको छ । कोरियामा उच्च सतर्कता अपनाउदै स्थानीय अधिकारीहरुले केही नगरपालिकामा विभिन्न खालका प्रतिबन्धहरु लगाइएको छ । यस्तै, पछिल्लो रिपोर्ट अनुसार इरानमा ६० जनामा संक्रमण देखिएको छ भने १२ जनाको मृत्यु भइसकेको छ ।
चीनमा हालसम्म ७७ हजार ६ सय ५९ जनामा कोरोना भाइरसको संक्रमण भेटिएको छ । यीमध्ये २७ हजार ३ सय २३ जना विरामीहरु निको भइ अस्पतालबाट डिस्चार्ज भएका छन् । इटालीमा २ सय २९ जना, जापानमा १ सय ५९ जना, सिंगापुरमा ९० जना, हङकङमा ८१ जना, अमेरिकामा ५३ जना, थाइल्याण्डमा ३५ जना, ताइवानमा ३० जना, अष्ट्रेलियामा २२ जना, मलेसियामा २२ जनामा कोरोना भाइरसको संक्रमण देखिएको रिपोर्टहरुमा उल्लेख छ ।
यस्तै, जर्मनीमा २२, भियतनामा २२, बेलायतमा १३, युएईमा १३, फ्रान्समा १२, क्यानडामा ११, मकाउमा १०, कुवेतमा ५, स्पेनमा ३, फिलिपिन्समा ३, भारतमा ३, बहराइनमा २, इजरायलमा २, ओमानमा २, रुसमा २ र अफगानिस्तान, बेल्जियम, कम्बोडिया, इजिप्ट, फिनल्याण्ड, इराक, लेबनान, नेपाल, श्रीलंका र स्वीडेनमा एक एक जनामा यो भाइरस देखिएको छ।
विश्व स्वास्थ्य संगठनले विश्वभर महामारी फैलिने सम्भावनालाई दृष्टिगत गर्दै आवश्यक तयारी गर्ने समय आएको जनाएको छ । अमेरिकाको सेन्टर फर डिजिज कन्ट्रोलले दक्षिण कोरियाका लागि तेस्रो तहको भ्रमण चेतावनी जारी गरेको छ। केन्द्रले अनावश्यक रुपमा कोरिया भ्रमण नगर्न सचेत गराएको छ ।
चिनियाँ राष्ट्रपति सी चिनफिङले सन् १९४९ मा जनगणतन्त्र स्थापना भएयता रोकथाम र नियन्त्रणका लागि सबैभन्दा कठिन समय भएको बताएका छन् । उनले कोरोनाका कारण देशको अर्थतन्त्रमा ठूलो असर परेको बताएका छन् ।
