_1704867435.jpeg)
धरान : लकडाउनको कारण सार्वजनिक तथा निजी सवारीसाधन चल्न दिइएको छैन । पास विना सवारीसाधन चलाउन पाइदैन ।
यस्तो बेला विरामी भइदिए वा अस्पताल विरामी लिएर जानुपरे निक्कै सास्ती हुन्छ । भनेको बेलामा एम्बुलेन्स पनि पाइदैन । जनताको यही समस्या बुझेर नै धरानको वडा नं ७ ले निःशुल्क यातायात सेवा सञ्चालनमा ल्याएको छ । वडाको यो सेवा यति प्रभावकारी बन्यो कि आफ्नो वडामा मात्र होइन, धरानको विभिन्न वडामा पनि सेवा उपलब्ध गराएको छ । त्यति मात्र होइन, केराबारी गाउँपालिकासम्म पनि वडा ७ को यो निःशुल्क यातायात सेवाले विरामी लाभान्वित भइसकेका छन् ।
आफ्ना वडामा जनतालाई अस्पताल एवं स्वास्थ्य सेवासम्म पुर्याउने, ल्याउने सेवाको लागि निःशुल्क यातायात व्यवस्था गरेको वडाअध्यक्ष जीवन सुवेदीले बताए । उनका अनुसार टेम्पोको व्यवस्था गरेर यो सेवा चैत २२ गतेदेखि नै शुरुवात भएको हो । आज(आइतबार) मध्याह्नसम्म १ सय १६ जनाले निःशुल्क यातायात सेवा लिइसकेका छन् । टेम्पोले अहिले एम्बुलेन्सकै काम गरिरहेकोछ ।
वडा नं ७ का बासिन्दाहरुको लागि शुरुवात गरिएको यो सेवा यही वडामा मात्र सिमित रहन सकेन । छिमेकी वडाहरु १५, ८, ३ सहित केराबारीसम्म पनि सेवा उपलब्ध गराइसकेको छ । ‘गाडीहरु चल्न नपाएपछि हामीले जनताको सेवाको लागि यो व्यवस्था गरेका छौं, यो थाह पाएपछि अन्य वडाबाट पनि आपत परेको बेला बोलाउछन्,’अध्यक्ष सुवेदीले भने,‘अहिलेसम्म ११६ जनाले सेवा लिइसकेका छन् ।’
वडाले लकडाउन अवधिभरको लागि दैनिक ७ सय रुपैया दिएर यो व्यवस्था गरेको हो । टेम्पोमा लाग्ने तेल खर्च जनसहभागिताबाट जुटिरहेको वडा कार्यालयले जनाएको छ । वडाबासीहरुले योजनालाई मन पराएपछि सेवाको भावनाले सहयोग गरिरहेको र टेम्पोको तेल खर्च त्यसैबाट व्यवस्थापन भइरहेको वडा सदस्य ठाकुर बहादुर कार्कीले जानकारी दिए ।
वडा ७ को यस्ता छन्, अन्य स्वास्थ्यका कार्यक्रमहरु
वडा नं ७ ले स्वास्थ्य क्षेत्रमा अन्य उल्लेखनीय कार्यहरु पनि गरिरहेको छ । २०७४ सालको निर्वाचन लगत्तै सुरक्षित मातृत्व पोषण भत्ता र नवजात बैंक खाता वडाले दिन थालेको थियो । वडाअध्यक्ष सुवेदीका अनुसार नेपालकै पहिलो महिला उपसभामुख लिला श्रेष्ठ सुब्बाको स्मृतिमा सुरक्षित मातृत्व पोषण भत्ता सुत्केरी महिलालाई दिने गरिएको छ । स्वर्गीय पुर्वउपसभामुख सुब्बा वडा ७ कै बासिन्दा थिइन् । सुत्केरी भएको ४ महिना पछि एक पटकलाई ३ हजार रुपैया वडा कार्यालयले उपलब्ध गराउछ ।
यस्तै, नवजात बैंक खाता कार्यक्रम पनि वडाको छ । यो कार्यक्रम भनेको बच्चा जन्मिए पछि ३५ दिनभित्र जन्म दर्ता गराएमा वडा कार्यालयले २ हजार रुपैयाको बैंक खाता खोलिदिन्छ । वडा ७ ले ग्लोबल आइएमई बैंकमा खाता खोलिदिने गरेको छ । यस्तै, पछिल्लो समय मृगौला र क्यान्सर पीडित वडाबासीलाई राज्यबाट पाउने उपचार सुविधाको लागि सिफारिश लिन आउदा वडा कार्यालयले यातायात खर्च वापत एक पटकलाई ३ हजार रुपैया पनि उपलब्ध गराउने गरेको छ ।
वडा सदस्य ठाकुरबहादुर कार्कीले जनताकै सेवाको लागि सरकार चल्नुपर्ने भएकोले यस्तो व्यवस्था गरिएको बताउँछन् । ‘जनताकै लागि सरकार भएकोले हाम्रो सरकार छ, सेवा दिन्छ भन्ने महशुस गराउनुपर्छ भनेर यी योजनाहरु अगाडि बढाइरहेका छौं,’उनले भने ।
