_1704867435.jpeg)
धरान: नेपालमा आज एकै दिन ३३४ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयको नियमित मिडिया ब्रिफिङमा प्रवक्ता डा.विकास देवकोटाले पछिल्लो चौबिस घण्टामा ३३४ जना नयाँ कोरोना संक्रमित पुष्टि भएको जानकारी दिए । योसँगै देशभर कुल संक्रमितहरुको संख्या २६३४ पनि पुगेको छ । संक्रमित संख्यामध्ये पुरुषको संख्या २४५० र महिला १८४ जना छन् । प्रदेश नं १ मा १२ जिल्लामा १९७ संक्रमित भेटिएको पनि मन्त्रालयले जनाएको छ ।
यस्तै, प्रदेश २ मा ९६३, बागमती प्रदेशमा ५९ जना, गण्डकी प्रदेशमा ५३ जना, प्रदेश नं ५ मा ८९८ जना, कर्णाली प्रदेशमा ३८३ जना र सुदुरपश्चिम प्रदेशमा ८१ जना संक्रमितहरु रहेको पनि प्रवक्ता डा.देवकोटाले जानकारी दिए ।
मृतक संख्या १० पुग्यो
कोरोना संक्रमणबाट पाल्पाको पुर्वखोलाका एक ४५ बर्षीय पुरुषको पनि मृत्यु भएको मन्त्रालयले जनाएको छ । प्रवक्ता डा.देवकोटाका अनुसार ती व्यक्ति ५ दिनअघि भारतबाट आएर क्वारेन्टाइनमा रहेका थिए । स्वासप्रश्वासमा समस्या आएपछि उनलाई मिशन अस्पतालमा ३ दिनअघि भर्ना गरिएको र २० गते स्वाब संकलन भएका उनको निधन भएको थियो । ‘रिपोर्ट पोजेटिभ आयो र योसँगै कोभिड १९ संक्रमितको मृत्यु भएको संख्या १० पुगेको छ,’उनले भने ।
