_1704867435.jpeg)
धरान: विदेशबाट आएर एन्फा एकेडेमी र होटल क्वारेन्टाइनमा बसेका ४ जनामा कोरोना संक्रमण देखिएको छ ।
संक्रमण देखिएका चारै जना पुरुष छन् । ती मध्ये ३ जना बहराइनबाट आएका हुन् भने एक जना साउदी अरबबाट आएका हुन् । धरान उपमहानगरपालिकास्थित स्वास्थ्य महाशाखा प्रमुख उमेश मेहताका अनुसार बहराइनबाट आएका धरान ८ का ३२ बर्षीय पुरुष, धरान १७ का ५० बर्षीय र धरान ११ का ४२ बर्षीय पुरुषमा संक्रमण पुष्टि भएको हो । यस्तै, साउदीबाट आएका धरान ५ का २९ बर्षीय पुरुषमा पनि संक्रमण पुष्टि भएको हो । उनीहरु विदेशबाट आएदेखि नै क्वारेन्टाइनमा थिए । ’आज रिपोर्ट पोजेटिभ आएपछि उहाँहरुलाई वीपी प्रतिष्ठानको आइसोलेसनमा पठाइसक्यौं,’मेहताले भने ।
संक्रमित चार जना मध्ये बहराइनबाट आएका २ जना एन्फा क्वारेन्टाइनमा थिए भने एक जना होटल क्वारेन्टाइनमा थिए । साउदीबाट आएका पनि एक जना एन्फा क्वारेन्टाइनमा नै थिए । उनीहरुसहित ४८ जनाको साउन ४ गते स्वाबको नमुना संकलन गरिएको थियो । ती मध्ये ४४ जनाको नेगेटिभ आएको छ भने ४ जनाको पोजेटिभ रिपोर्ट आएको हो ।
