_1704867435.jpeg)
धरान: वीपी कोइराला स्वास्थ्य विज्ञान प्रतिष्ठान धरानमा बेथिती अन्त्यको माग गर्दै प्रतिष्ठान सुधार दबाब समुहले सुझावसहित अवधारणा पत्र बुझाएको छ ।
आज दिउँसो प्रतिष्ठानका चारै जना पदाधिकारीहरुलाई १८ बुँदे सुझावहरुसहित प्रतिष्ठान बेथिती अन्त्यको लागि दबाब समुहले अवधारणा पत्र बुझाएको हो । दबाब समुहका संयोजक तथा सुनसरी उद्योग वाणिज्य संघका अध्यक्ष गिरीधारी सापकोटाले प्रतिष्ठानका उपकुलपति डा.ज्ञानेन्द्र गिरीलाई सुझावसहितको अवधारणा पत्र बुझाएका थिए । त्यसअघि दबाब समुहका सहसंयोजक प्रा.डा.राजेन्द्र शर्माले अवधारणा पत्र वाचन गरेर सुनाएका थिए ।
दबाब समुहले प्रतिष्ठानमा व्यवस्थापकीय बिशेषज्ञताको खाँचो रहेको औल्याएको छ । भिजन, मिशन, गोल, अब्जेक्टिभ, स्ट्राटेजी र एक्टिभिटीको एउटा चरणवद्ध श्रृंखाला पुरा गर्ने गतिमा प्रतिष्ठानको क्रियाकलापहरु निर्देशित गराउनुपर्नेमा पनि समुहले जोडदिएको छ । यसको लागि स्पष्ट नीति र योजना तर्जुमा गर्नुपर्ने आवश्यकता रहेका पनि समुहले जनाएको छ । समुहले सुझावकोरुपमा १८ बुँदा प्रस्तुत गर्दै सिनेटर संयोजक रहेको अधिकार सम्पन्न एक अनुगमन समिति गठन गर्न सुझाव दिएको छ । यस्तै, एक्सन प्लान तयार गर्न बिशेषज्ञ सहितको समुह गठन गर्न, सामाजिक लेखा परिक्षण गर्न, पिसिआर परिक्षण २४ सै घण्टा चालु गर्न, कोभिड अस्पताल भित्रका व्यवस्था तुरुन्त निराकरण गरि सिसि क्यामेरा र गेटमा मनिटर राख्नलगायत सुझावहरु पनि दिएको छ ।
दबाब समुहका सहसंयोजक डा.शर्माले प्रतिष्ठानका पदाधिकारीहरुबीचमा हुने बेमेलले अख्तियारमा निवेदन पुग्ने र खरिद प्रक्रियाहरु बीचैमा अवरुद्ध हुने खालको विकृतिहरु अन्त्य हुनुपर्ने बताए । महामारीको बीचमा सय बेडको कोभिड अस्पताल स्थापना भएपनि अस्पताल भित्रको हालतबारे निको भएर जाने संक्रमित, मृत्यु भएका संक्रमितका आफन्तहरुबाट धेरै गुनासोहरु सुनिएको उनको भनाई थियो । ‘वीपी प्रतिष्ठानमा अराजकता छ, चरम राजनीति छ, भ्रष्टचार छ भन्ने व्यापक चर्चा भइरहदा सचेत धरानेहरु सुत्न सक्दैनौं, निदाउन सक्दैनौं । हामी जुर्मुराउन स्वभाविक हो,’डा.शर्माले भने,‘हाम्रो यो आवाजलाई विरोधको स्वरकोरुपमा नभएर सुझाकोरुपमा आएको आवाज हो भनेर बुझिदिनु हुनेछ ।’
दबाब समुहका संयोजकसमेत रहेका सुनसरी उद्योग वाणिज्य संघका अध्यक्ष गिरीधारी सापकोटाले एक सातापछि अवधारणा पत्रमा उल्लेख भएका बिषयहरुमा सुधार भए नभएको बारे पुनः छलफल गर्न आउने बताए । उनले कोभिड अस्पतालमा राम्रो हेरचाह नभएको, खाना राम्रो नदिएको गुनासोहरु सुनिएको बताए । ‘एक साता पछि तपाईहरुसँग छलफलमा आउदा बजारमा सुनिएको जस्तो हल्ला निराकरण हुनेछ, वीपीको बारेमा सकरात्मक सुन्न पाइनेछ । चारै जना मिलेर अघि बढ्नु हुनेछ भन्नेमा आशावादी छौं,’सापकोटाले भने,‘कोभिड अस्पतालकोबारे धेरै कुराहरु सुनिएको छ । अब सिसि क्यामेरा राखेर बाहिर विरामीको आफन्त स्क्रिनमा हेर्ने व्यवस्था हुनुपर्छ । हरेक बेडमा बेल राखिदिनुपर्छ, समस्या भएपछि उहाँहरुले बेल बजाउने व्यवस्था हुनुपर्छ । बेल बजाउदा डाक्टरहरु तत्काल जानुहुन्छ । एक हप्तामा सकरात्मक सुधार पाउछौं भन्ने आशा छ ।’
भिडियो-
