_1704867435.jpeg)
धरान: ईलाका प्रहरी कार्यालय धरानको गस्ती टोलीले आज बिहान वडा नं ३ बाट टेम्पोबाट घरेलु मदिरा(रक्सी) नियन्त्रणमा लिएको छ ।
बिहान करिब साढे ५ बजे चिनिया चोकबाट प्रहरी गस्ती टोलीले को १ ह ७९६० नम्बरको ट्याम्पोलाई घरेलु मदिरासहित नियन्त्रणमा लिएको हो । टेम्पो चालक गस्ती टोलीलाई देखेपछि बाटोमा नै टेम्पो छोडेर भागेका थिए । प्रहरीले शंका लागेर टेम्पो चेकजाँच गर्दा पछाडी सिट नजिक खाली ठाँउमा ८ वटा जारमा घरेलु मदिरा फेला परेको डिएसपी ढुण्डीराज न्यौपानेले जानकारी दिएका छन् ।
उनका अनुसार ठुलो सानो गरी जम्मा ८ वटा जारमा रक्सी रहेको छ । ती रक्सी अन्दाजी एक सय लिटर रहेको छ । मदिरा र ओसारपसार गर्ने टेम्पोलाई आबश्यक कारबाहीको लागि आन्तरिक राजस्व कार्यालय धरान पठाइएको छ भने फरार रहेका चालकको खोजतलास भइरहेको प्रहरीले जनाएको छ ।
