धरान: एन्फा एकेडेमी धरान १७ को क्वारेन्टाइनमा रहेकामध्ये १० जनालाई आज घर पठाइएको छ ।

उनीहरुको पिसिआर नेगेटिभ आएको र ७ दिन पुरा भएकाहरुलाई घर पठाइएको हो । घर पठाइएका मध्ये ३ जनाको दोस्रो पटक पिसिआर जाँच गर्दा पनि रिपोर्ट नेगेटिभ आएकाहरु भएको वडा नं १७ का अध्यक्ष मनोज भट्टराईले जानकारी दिए । उनका अनुसार उनीहरु यसअघि संक्रमित भएका एक युवाका साथी भएकोले पुनः दोस्रो पटक पिसिआर जाँच गरिएको थियो । ‘पहिला पनि रिपोर्ट नेगेटिभ नै आएको थियो, तर एउटै रुममा बस्ने साथीको पोजेटिभ आएकोले फेरि स्वाब परीक्षण गर्न पठाएका थियौं,’अध्यक्ष भट्टराईले भने,‘दोस्रो पटक पनि नेगेटिभ आएपछि उनीहरुसँगै ७ दिन कटेकालाई घर पठाइयो ।’

एन्फा क्वारेन्टाइनमा अहिले १० जना छन् । ती मध्ये ५ जना पिसिआर नेगेटिभ रिपोर्ट आएका हुन् भने ५ जना स्वाब परीक्षण गर्न बाँकी हुन् । रिपोर्ट नेगेटिभ आएकाहरुलाई पनि ७ दिन कटेपछि घर पठाइनेछ । ‘आज जोगवनी र काकडभिट्टा नाकाबाट थप ६ जना आउदैछन् भन्ने खबर आएको छ,’अध्यक्ष भट्टराईले भने । पठाइएकाहरु सबै धरानकै हुन् ।