झापा: झापाका तिन छुट्टाछुट्टै स्थानबाट ब्राउनसुगर र गाँजासहित ६ जना पक्राउ परेका छन् ।

लागुऔषध नियन्त्रण ब्युरो काकडभिट्टाको प्रहरी टोलीले मेचीनगर नगरपालिका १० का १८ बर्षीय बिशाल लिम्बु र मेचीनगर नगरपालिका १२ का २३ बर्षीय राजन श्रेष्ठलाई ८.५ ग्राम ब्राउन सुगरसहित मेचीनगर १३ ईलाम रोडबाट शनिवार दिउँसो ३ बजे पक्राउ गरेको हो । मे ४ प ७७२६ नम्बरको मोटरसाईकलमा रहेका उनीहरुलाई रोकेर चेकजाँच गर्ने क्रममा उक्त परिणामको लागुऔषध बरामद भएको प्रहरीले जनाएको छ ।

यसैगरी, बिर्तामोड नगरपालिका १ का २१ बर्षीय संदिप धिमाल, २३ बर्षीय आकाश राई र अर्जुनधारा नगरपालिका ७ का १९ बर्षीय आषिश राईलाई १४ ग्राम ब्राउन सुगरसहित अदुवा पुल छेउबाट शनिवार दिउँसो ४ बजे पक्राउ गरेको छ । पुल छेउमा लागुऔषधको कारोवार भईरहेको भन्ने बिशेष सूचनाका आधारमा प्रहरी टोलीले तिनै जनालाई पक्राउ गरेको हो ।

यस्तै, ईलाका प्रहरी कार्यालय दमकबाट खटिएको प्रहरी टोलीले ४ केजी ५८ ग्राम गाँजासहित दमक नगरपालिका १ का २६ बर्षीय अर्पण राईलाई पक्राउ गरेको छ । आफ्नै कोठाबाट लागुऔषध गाँजाको कारोवार गर्ने गरेको भन्ने बिशेष सूचनाका आधारमा प्रहरी टोलीले उनको कोठा खानतलासी गर्दा उक्त गाँजा बरामद गरेको हो । कोठाबाट गाँजा वरामद भएसंगै राईलाई पनि प्रहरीले नियन्त्रणमा लिएको छ । पक्राउ परेकाहरुलाई कानूनी कारवाही तथा अन्य थप अनुसन्धान भईरहेको जिल्ला प्रहरी कार्यालय झापाले जनाएको छ ।