धरान: सुसाइड नोट लेखेर वेपत्ता भएका डेन्टल सर्जन डा.दिगम्बर झा सकुशल भेटिएका छन् ।

उनी काभ्रेको भुम्लु गाउँपालिका १० स्थित ५५ किलोमा भेटिएको प्रहरीले जनाएको छ । गाडी लुकाएर बसिरहेको अवस्थामा जिल्ला प्रहरी कार्यालय काभ्रेको टोलीले डा. झालाई फेला पारेको प्रवक्ता एवं डिएसपी कुमार बिक्रम थापाले जानकारी दिए । डा.झा आज बिहानै भक्तपुरबाट सम्पर्क विहिन भएका थिए । उनले सामाजिक सञ्जाल फेसबुकमा सुसाइड नोट पोष्ट गरेका थिए ।

डा.झा भक्तपुरको ठिमीस्थित द डेन्टल सिटीका निर्देशक हुन् । उनले बिडिएस धरानस्थित वीपी कोइराला स्वास्थ्य विज्ञान प्रतिष्ठानबाट गरेका थिए । उनी बिहानै बा १६ च ८६७९ नम्बरको कार लिएर घरबाट निस्किएर वेपत्ता भएका थिए । उनको फेसबुक पोष्ट सार्वजनिक भएपछि परिवार, साथीभाई र प्रहरीले खोजी तीब्र पारेको थियो । उनको मोवाइलको अन्तिम ट्रेसिंग पनौतीमा भएको थियो ।