सुनसरी: मोटरसाइकल चोरी गर्ने गिरोहका २ जनालाई प्रहरीले इटहरीबाट चोरीको मोटरसाइकलसहित पक्राउ गरेको छ ।

पक्राउ पर्नेमा इटहरी उपमहानगरपालिका ४ का २४ बर्षीय विकास भुजेल र विवेक अधिकारी रहेका छन् । जिल्ला प्रहरी कार्यालय सुनसरीका अनुसार को १८ प ८५३६ र को ७ प ९६२५ नम्बरको चोरी भएको मोटरसाइकलसमेत वरामद भएको छ । चोरी गरेको मोटरसाइकल विकासले आफ्नै घरभित्र लुकाई राखेको सुचनाको आधारमा ईलाका प्रहरी कार्यालय इटहरीको टोलीले छापा मारेको थियो । दुवै मोटरसाइकल भुजेलको घरभित्र फेला परेको थियो । दुवै जनालाई जिल्ला अदालत सुनसरीबाट चोरी मुद्दामा म्याद थप गरि अनुसन्धान भइरहेको प्रहरीले जनाएको छ ।