धरान: प्रहरीले धरानबाट २ जनालाई लागुऔषधसहित पक्राउ गरेको छ ।

ईलाका प्रहरी कार्यालय धरानले बिहिवार अपरान्ह ४ बजे धरान १० बाट ४८ बर्षीय पुर्ण बहादुर लिम्बु र धरान ११ का ५० बर्षीय साखुरा लिम्बुलाई लागुऔषधसहित पक्राउ गरेको हो । उनीहरुको घरको कोठामा नै लागुऔषध राखेको भन्ने सूचनाका आधारमा प्रहरी टोलीले सर्च गरेको थियो । उनीहरुको घर कोठाबाट डाइलेक्स डिसि १०० एमएल लेखिएको ३६ बोतल, स्पास्मोप्रोक्सिवन प्लस ७२ क्याप्सुल, नाईट्रोसम ६ ट्याब्लेट र नगद २९ हजार ५०० समेत बरामद गरेको प्रहरीले जनाएको छ । लागुऔषध सहित पक्राउ परेका दुवै जनाको सम्बन्धमा थप अनुसन्धान भईरहेको ईलाका प्रहरी कार्यालय धरानले जनाएको छ ।

यस्तै, मोरङको कटहरी गाउँपालिका १ बाट २० बर्षीय अनुकेत माझीलाई पनि लागुऔषध सहित प्रहरीले पक्राउ गरेको छ । प्रहरीले उनको साथबाट नाईट्राभेट ५०० ट्याब्लेट र डाईलक्स डिसी ७ बोतल बरामद गरेको जनाएको छ । यसैगरि, झापाको दुई छुट्टाछुट्टै स्थानबाट ब्राउनसुगर सहित २ जना पक्राउ परेका छन् । बिशेष सूचनाको आधारमा ईलाका प्रहरी कार्यालय अनारमनी र लागुऔषध नियन्त्रण ब्यूरो काकडभिट्टाबाट खटिएको टोलीले बिहिवार दिउँसो उनीहरुलाई पक्राउ गरेको हो । प्रहरीले बिर्तामोड नगरपालिका ५ बाट ९.५ ग्राम ब्राउनसुगर सहित अर्जुनधारा नगरपालिका ६ का २५ बर्षीय आशिष थापालाई पक्राउ गरेको हो । यस्तै, अर्जुनधारा नगरपालिका ९ बाट ३९ ग्राम ब्राउनसुगरसहित बुद्धशान्ति गाउँपालिका २ का २२ बर्षीय प्रिन्स खनाललाई पक्राउ गरेको प्रहरीले जनाएको छ ।