_1704867435.jpeg)
धरान: धरान १० स्थित महेन्द्र बहुमुखी क्याम्पसले भाडामा लगाएको सटरमा आगलागी भएको छ ।
सटर भाडामा लिएर २ बर्षदेखि व्यवसाय सञ्चालन भइरहेको अक्वा सोलुसन इन्टरप्राइजेजमा आज दिउँसो आगलागी भएको हो । आगलागीबाट अन्दाजी ८ लाख जति क्षति पुगेको अनुमान छ । राजु राईको नाममा दर्ता भएको व्यापारिक फर्मका पार्टनर खुमन याक्खाका अनुसार १५ वटा जति पानी फिल्टर जलेको छ । यस्तै, कोठामा भएको फर्निचरहरु पनि जलेर क्षति पुगेको छ । ‘सबै हिसाब गर्दा ८, १० लाख जति क्षति भएको अनुमान छ, तर अहिल्यै यति नै भन्नेस्थिति छैन,’उनले टेलिफोन सम्पर्कमा भने । प्रहरीले भने करिब ५ लाख बराबरको मात्र क्षति भएको जनाएको छ ।
दिउँसो करिब साढे ३ बजेतिर आगलागी भएको हो । प्रहरी र दमकलको संयुक्त प्रयासमा आगो नियन्त्रणमा आइसकेको छ । पसल बन्द गरेर गएको झण्डै आधा घण्टा पछि अगलागी भएको थियो । विद्युत सर्ट भएर आगलागी भएको प्रहरीको अनुमान छ । ‘त्यहाँको अवस्था हेर्दा विद्युत सर्ट भएर आगलागी भएको देखियो । अहिले नियन्त्रणमा आइसकेको छ,’धरानका डिएसपी ज्ञानेन्द्र बस्नेतले भने ।
