_1704867435.jpeg)
धरान: दलित मुक्ति आन्दोलनमा नेतृत्वदायी तथा महत्वपुर्ण योगदान पुर्याएका धरानका दुई जना दलित अगुवालाई सम्मान गरिएको छ ।
धरान उपमहानगरपालिकाको दलित विकास समितिले आइतबार पुर्वमन्त्रीसमेत रहेका नेता मिन विश्वकर्मा र नेतृ नरमाया परियारलाई सम्मान गरेको हो । उनीहरु दुवैलाई दलित अगुवा स्मृति समाज सुधार सम्मानबाट सम्मान गरेको समितिले जनाएको छ । समितिका सदस्य सचिव तारा लामगादेका अनुसार दुवैलाई जनही १० हजार ५ सय नगदसहित सम्मान गरिएको थियो । पुर्वमन्त्री विश्वकर्माले तीन दशकदेखि जातीय विभेदविरुद्ध समाज सुधारको लागि नेपालको दलित आन्दोलनमा महत्वपुर्ण योगदान पुर्याएको समितिको भनाई छ ।
यस्तै, अर्का सम्मानित नेतृ परियारले विगत २ दशकदेखि दलित मुक्ति आन्दोलनमा नेतृत्वदायी भुमिका निर्वाह गरेको, दलित उत्थान समन्वय समितिको संस्थापक अध्यक्ष, दलित महिला सञ्जालको संस्थापक अध्यक्षलगायत महत्वपुर्ण जिम्मेवारीसमेत निर्वाह गरिसकेको कारण सम्मान गरिएको समितिको भनाई छ । ‘दिलबहादुर रामदामको संयोजकत्वमा छनौट समिति गठन गरेका थियौं, समितिले उहाँहरु २ जनाको सिफारिश गरेकोले सम्मान गरिएको हो,’सदस्य सचिव लामगादेले भने,‘अग्रजहरुलाई सम्झनुपर्छ, र जिउँदैमा सम्मान गर्नुपर्छ भन्ने मान्यता अनुसार यो सम्मानको थालनी गरेका हौं ।’
दलित विकास समितिका अनुसार दिवंगत भइसकेका धरानका अगुवा दलित अभियन्ताहरुको स्मृतिमा दलित अगुवा स्मृति समाज सुधार सम्मानको शुरुवात गरिएको हो । यो सम्मान स्वर्गीय जदुवीर विश्वकर्मा, टि.आर.विश्वकर्मा, पृथ्वीमान मोते र डिल्लीराम शिवाको स्मृतिमा दिइन थालिएको हो । नेपालको दलित मुक्ति आन्दोलनमा उनीहरुको ठुलो योगदान छ ।
यसैगरि, सोही कार्यक्रममा अन्तरजातीय विवाह गरेका १४ जना जोडीलाई पनि सम्मान गरिएको थियो । उक्त कार्यक्रममा दलित परिवारमा विवाह गरेर आएकी गैरदलित बुहारीकोतर्फबाट निरु पौडेल र शारदा मास्केले अनुभव बाँडेकी थिइन् भने गैरदलित युवती विवाह गरेको परिवारकोतर्फबाट ज्वाँईको अनुभव धरानका सञ्चारकर्मी विनोद दर्नालले अनुभव बाँडेका थिए । ‘समाज हामीसँग सँगै जानुपर्छ, दलित मुक्ति आन्दोलनको दलितको मात्र होइन, सबैको हुनुपर्छ । गैरदलितहरु पनि आन्दोलनमा समाहित हुनुपर्छ भन्ने उद्देश्य हो,’सदस्य सचिव लामगादेले भने । कार्यक्रम दलित विकास समितिका संयोजक किसोर परियारको अध्यक्षतामा भएको थियो ।
