विराटनगरः मोरङको सुनबर्षी नगरपालिका ८ बाट प्रहरीले कछुवासहित ४ जनालाई पक्राउ गरेको छ । 

मोरङ प्रहरीका अनुसार गएमध्यराती करिब १२ बजे सुनबर्षी ८ स्थित सिक्टी विश्वकर्मा कुडेली सडकखण्डमा इलाका प्रहरी कार्यालय रंगेलीको टोलीले कछुवासहित ४ जना पक्राउ गरेको हो । प्रहरीले मेच १० प ५६२ नम्बरको मोटरसाइकल चेकजाँच गर्ने क्रममा पथरी शनिश्चरे नगरपालिका १ पुर्व बसस्टेण्डका ४३ बर्षीय जीवन गुरुङ र पछाडि सवार सुनबर्षी १ केचना शुक्रबारेका २५ बर्षीय दिपन भन्ने घेमराज थापा कछुवासहित पक्राउ गरेका थिए । उनीहरुले बोकेको खैरो रङको झोलाभित्र करिब ८ केजी तौल भएको एउटा कछुवा बोकेका थिए । 

यस्तै, को २३ प ५९३१ नम्बरको मोटरसाइकलमा रहेका सुनबर्षी १ केचनाका २१ बर्षीय निरज खण्ड्का र २० बर्षीय आकाश रायमाझी पनि पक्राउ परेका छन् । उनीहरुले पनि उक्त कछुवा ल्याउन सहयोग गरेको देखिएपछि नियन्त्रणमा लिइएको मोरङ प्रहरी प्रवक्ता एवं डिएसपी मानबहादुर राईले जानकारी दिए । पक्राउ परेका चारै जनालाई आवश्यक कारबाहीको लागि सबडिभिजन वन कार्यालय आमतोला रंगेलीमा बुझाइएको पनि मोरङ प्रहरीले जनाएको छ ।