_1704867435.jpeg)
धरान: इटहरी उपमहानगरपालिका २ स्थित राजदेगवी टोलमा हेण्ड ग्रिनेड फेला परेको छ ।
वडा २ को पोङ दोर्जी मार्ग ग्रावेल गरिएको भित्री सडक खण्डमा उक्त प्लाष्टिक हेण्ड ग्रिनेड फेला परेको जिल्ला प्रहरी कार्यालय सुनसरीले जनाएको छ । प्रहरीका अनुसार स्थानीय तिलकबहादुर रानाको ११ बर्षीय छोरा फविन मगरले उक्त ग्रिनेड फेला पारेको थियो । तत्काल सामुदायिक प्रहरी विट हवाई चौकलाई ग्रिनेडबारे जानकारी गराएपछि ईलाका प्रहरी कार्यालय इटहरीको टोली परिचालन भएको थियो ।
उक्त ग्रिनेडलाई नेपाली सेनाको २ नम्बर बाहिनी इटहरी अन्तर्गतको कृष्णदल गणको बम डिस्पोजल टोलीले डिस्पोज गरेको पनि जिल्ला प्रहरी कार्यालय सुनसरीले जनाएको छ । जिल्ला प्रहरी कार्यालयका अनुसार उक्त ग्रिनेड मिक्स गिटीमा मिसिएर आएको हुनसक्ने अनुमान गरिएको छ । त्यसैले मिक्स गिटी ल्याइएको सेउती खोलामा समेत सुरक्षा टोली परिचालन गरिएको प्रहरीले जनाएको छ ।
