विराटनगर: श्रीमान् श्रीमतिको झगडा मिलाउन जादा उल्टै कुटपिट गरि एक जनाको ज्यान गएको घटनामा ४ जना पक्राउ परेका छन् ।

जिल्ला प्रहरी कार्यालय मोरङका अनुसार भदौ ३ गते राती मोरङको मिक्लाजुङ गाउँपालिका ६ को भण्डारी टोलमा ३३ बर्षीय रविन तामाङ र श्रीमतिबीच पारिवारिक विवाद भएको थियो । उक्त विवाद मिलाउन गएका ४५ बर्षीय धनराज लिम्बु र ५५ बर्षीय दुर्गाबहादुर कार्कीमाथि कुटपिट भएको थियो । उनीहरुलई लाठीले टाउकोमा प्रहार गरि घाइते बनाएका थिए । दुवैको तत्काल स्थानीय अस्पतालमा उपचार गरिएको थियो भने धनराजलाई थप उपचारको लागि विराटनगर २ स्थित विराटनगर अस्पतालमा भर्ना गरिएको थियो ।

उपचारको क्रममा घाइते धनराजको शनिबार राती ११ बजेर ४५ मिनेटमा मृत्यु भएको मोरङ प्रहरीले जनाएको छ । अर्का घाइते दुर्गाबहादुर स्थानीय अस्पतालमा उपचार पश्चात घर फर्की सकेका छन् । कुटपिटमा संलग्न भएको आरोपमा प्रहरीले रविन तामाङ, २५ बर्षीय संजय तामाङ, ३० बर्षीय आईतराज तामाङ र ४० बर्षीय भाग्य बम्जनलाई पक्राउ गरेको छ । उनीहरुलाई ईलाका प्रहरी कार्यालय उर्लाबारीको टोलीले पक्राउ गरेको हो । पक्राउ परेका चारै जनालाई मोरङ जिल्ला अदालतबाट ज्यान सम्बन्धी कसुरमा ८ दिनको म्याद थप गरि अनुसन्धान गरिरहेको प्रहरीले जनाएको छ ।