धरान: मोरङ प्रहरीले मोटरसाइकल र सिटी सफारी चोरीमा संलग्न रहेका ६ जनालाई पक्राउ गरेको छ । पक्राउ परेका माध्ये ४ जना मोटरसाइकल चोरीमा संलग्न हुन् भने २ जना सफारी चोरीका आरोपी भएको प्रहरीले जनाएको छ ।

मोरङ प्रहरी प्रवक्ता एवं डिएसपी दिपक श्रेष्ठका अनुसार पुष ८ गते विराटनगर ७ स्थित मेरिल्याण्ड कलेज अगाडि पार्किङ गरेर राखेको टिभिएस कम्पनीको आटिआर को २३ प ८८११ नम्बरको मोटरसाइकल चोरी भएको थियो । उक्त चोरी भएको मोटरसाइकलसहित संलग्न ४ जना पक्राउ परेको डिएसपी श्रेष्ठले बताए । 

प्रहरीका अनुसार पक्राउ पर्नेमा सुनसरीको दुहबी नगरपालिका ४ का २२ बर्षीय समिर मियाँ, विराटनगर १५ का २० बर्षीय नितेश मेहता, बेलबारी ११ का २० बर्षीय सागर लिम्बु र २२ बर्षीय सनम मगर रहेका छन् । पक्राउ परेका ४ जनालाई मोरङ जिल्ला अदालतबाट चोरी कसुरमा ५ दिनको म्याद थप गरेर अनुसन्धान भइरहेको मोरङ प्रहरीले जनाएको छ । 

यस्तै, चोरी भएको सिटी सफारीसहित थप २ जनालाई पक्राउ गरिएको डिएसपी श्रेष्ठले जानकारी दिए । पुष १४ गते दिउँसो ३ बजे विराटनगर १५ स्थित महेन्द्र चोकबाट को १ हज ३४०९ नम्बरको सिटी सफारी चोरी भएको थियो । 

उक्त सफारी चोरी कार्यमा संलग्न रहेका विराटनगर १४ का २५ बर्षीय मो.जावेद र २२ बर्षीय सञ्जिव साहलाई ईलाका प्रहरी कार्यालय रानीले सफारीसहित पक्राउ गरेको मोरङ प्रहरीले जनाएको छ । उनीहरुलाई विराटनगर १८ स्थित फडानीबाट पक्राउ गरिएको हो । दुवैलाई चोरी कसुरमा अदालतबाट ५ दिनको म्याद थप गरि अनुसन्धान जारी राखेको डिएसपी श्रेष्ठले जानकारी दिए ।