_1704867435.jpeg)
धरान: सुनसरीको हरिनगर ६ बाट एक बालकको अहपरण गरेर लैजादै गर्दा एक व्यक्ति पक्राउ परेका छन् ।
पक्राउ पर्नेमा इनरुवा १० जल्पापुरका ईम्तियाज भन्ने ईन्जात मियाँ रहेका छन् । उनले शनिबार हरिनगर ६ इसराइल कामतबाट शिवचरण मेहताको १३ बर्षीय छोरा धिरजकुमार मेहतालाई अपहरण गरि लैजादै गर्दा पक्राउ गरेको सुनसरी प्रहरीले जनाएको छ । प्रहरीका अनुसार अज्ञात व्यक्तिले मोटरसाइकलमा जर्बजस्ती चढाएर एक बालकलाई अपहरण गरेको भन्ने जानकारी भएको थियो । लगत्तै प्रहरी चौकी भुटाहाको टोली परिचालन भएको थियो । राती करिब ७ बजे हरिनगर १ रमनगर भुटाहा भित्री सडक खण्डमा ईन्जातले भारतीय नम्बरको मोटरसाइकलमा बालकलाई चढाउन खोज्दै गरेको भेटिए पछि प्रहरीले नियन्त्रणमा लिएको जनाएको छ । उनलाई तत्काल उद्दार गरेर सोधपुछ गर्दा ईन्जातले को २६ प ४२२४ नम्बरको मोटरसाइकलमा जर्बजस्ती चढाएर लगेको वयान बालकले दिएका थिए ।
ती बालकका अनुसार मोटरसाइकलबाट उनी भाग्न सफल भएका थिए । उनी उम्किएपछि ईन्जातले मोटरसाइकल बाटोमा रोकेर खोज्न थालेका थिए । त्यही मौकामा उनले सोही मोटरसाइकल लिएर भागेका थिए । तर, रामनगर भुटाहा स्थित भित्री सडकमा तेल सकिएको र ईन्जात अर्को भारतीय नम्बर प्लेटको मोटरसाइकल लिएर पछ्याउदै आएर उनलाई भेटेका थिए । बालकलाई भेटेपछि जर्बजस्ती मोटरसाइकलमा चढाएर लैजाने प्रयास गर्दै गर्दा प्रहरीले फेला पारेर उनलाई पक्राउ गरेको थियो ।
सुनसरी प्रहरीका अनुसार पक्राउ परेका मियाविरुद्ध मुलुकी फौजदारी अपराध संहिता २०७४ को परिच्छेद १७ अनुसार अपहरण तथा शरीर बन्धक सम्बन्धी कसुरमा कारबाही प्रक्रिया अघि बढेको छ । उनलाई आइतबार जिल्ला अदालतबाट ५ दिनको म्याद थप भएको र अनुसन्धान प्रक्रिया अघि बढाइएको प्रहरीले जनाएको छ ।
