_1704867435.jpeg)
धरानः लकडाउनको बेला धरानको बजर सुनसान छ, तर यही मौकामा जंगलमा भने मानिसहरुको चहलपलह हुन्छ ।
लकडाउनले वन समुहका पदाधिकारीहरु घरभित्रै सिमित भएको र सुरक्षाकर्मीहरुको ध्यान पनि लकडाउनतर्फ मोडिएको मौकामा धरानका सामुदायिक वन क्षेत्रमा व्यापक फडानी भएको पाइएको छ । बिशेष गरि लाथ्राहरु जथाभावी काटिएका छन् । यही समय वन्यजन्तुको शिकार गर्नेहरु पनि जंगलमा पसेका छन् ।
धरानको वडा नं १५ स्थित बाँझगरा सामुदायिक वन समुहका उपाध्यक्ष कुमार भारतीका अनुसार एकै दिन सय जना भन्दा बढी समुहमा मानिसहरु जंगल पस्ने गरेको पाइएको छ । अहिलेसम्म संरक्षण भइरहेको लाथ्रा जथाभावी काटेर ठुलो नोक्सानी पुर्याइरहेको उपाध्यक्ष भारतीले बताए । ‘लकडाउनले बजार सुनसान छ, तर डेढ दुई सय मानिसहरु जंगलतिर पस्दो रहेछ,’उनले भने,‘यही अवस्था रहीरह्यो भने जंगल सखाप हुन्छ ।’ 
लकडाउनको समयमा पनि मानिसहरु जंगल पस्छन् भनेर वन समुहले अनुमान नै लगाउन नसक्दा धेरै क्षति भएको हो । बाँझगरा वन समुहसँगै धरान ५ स्थित बालऋर्षि सामुदायिक वन, धरान ६ स्थित पानवारी सामुदायिक वन, धरान १७ स्थित उदय सामुदायिक वन, धरान २० कार्कीछाप, धरान ४ को सर्दु जलाधार क्षेत्रलगायत थुप्रै वन क्षेत्रमा दिउँसो र राती पनि वन फडानी र वन्यजन्तुको शिकार हुने गरेको छ । पाँचकन्या सब डिभिजन कार्यालयका रेञ्जन इश्वरी बास्तोला लकडाउनको मौकामा ७ बर्षदेखि ७० बर्षसम्मका वृद्ध पनि जंगलमा भेटिएका छन् । पाँचकन्या र विष्णुपादुका सब डिभिजन कार्यालय अन्र्तगत २ दर्जन बढी सामुदायिक वन समुह छ । तर, यी सबैको लागि मात्र ४ जना सशस्त्र वन रक्षक छन् । एउटा पुरानो गाडी छ । सकेसम्म वन जोगाउन दिनरात खटिएको रेञ्जर बास्तोलाले बताए ।
केही दिनअघि बाँझगरा, पानवारी र बालऋर्षि वन समुहको ११ सदस्यीय संयुक्त वन संरुक्षण टोली आइतबार गठन भएको छ । यो टोलीले बिहान ५ बजेदेखि राती ९ बजेसम्म समय मिलाएर गस्ती गर्ने र कसैलाई पनि जंगल प्रवेश गर्न नदिने गरि खटिएको बास्तोलाले बताए । सशस्त्र प्रहरीले धरान ४, १३ र २० नम्बर वडामा पर्ने जलाधार क्षेत्रमा रुख जथाभावी काट्ने दुई दर्जन बढीलाई नियन्त्रणमा लिएको थियो ।
