_1704867435.jpeg)
धरान: नेपालमा पछिल्लो २४ घण्टामा ८८४ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका प्रवक्ता डा.जागेश्वर गौतमका अनुसार २४२ महिला र ६४२ पुरुषमा संक्रमण पुष्टि भएको हो । योसँगै कुल संक्रमितहरुको संख्या ३७ हजार ३ सय ४० पुगेको छ । उनीहरुमध्ये २० हजार ५५५ जना कोरोनामुक्त भएका छन् ।
१२ जनाको निधन
पछिल्लो २४ घण्टामा नेपालमा १२ जना कोरोना संक्रमितहरुको निधन भएको छ । ती मध्ये ३ जना महिला र ९ जना पुरुष छन् ।
स्वास्थ्य तथा जनसंख्या मन्त्रालयका प्रवक्ता डा.गौतमका अनुसार मृत्यु हुनेमा पाल्पाकी ३० बर्षीया, काठमाण्डौंकी ५१ बर्षीया र भक्तपुरकी ६२ बर्षीया महिलाहरु छन् । यस्तै, पर्सामा ४८ र ३९ बर्षीय पुरुषको निधन भएको छ भने सिरहामा ८४ बर्षीय, गोर्खामा ३८ बर्षीय, कास्कीमा ५८ बर्षीय पुरुषको मृत्यु भएको छ ।
यसैगरि, काठमाण्डौमा ८३ बर्षीय, भक्तपुरमा ८२ बर्षीय, ललितपुरमा ७२ र ६१ बर्षका पुरुषको उपचारको क्रममा निधन भएको छ । योसँगै नेपालमा कोरोना संक्रमित मृतकहरुको संख्या २०७ पुगेको छ । यो संख्या कुल संक्रमितहरुमध्येको ०.५५ प्रतिशत भएको पनि प्रवक्ता गौतमले जानकारी दिए ।
